के त्यो भ्रष्टाचार होइन् ?

किन अन्याय र अत्याचार यहाँ ?
नुन् चुक हाले झैँ छ, व्यवहार यहाँ,
कुना, कन्दरा ठुला र गुफामा,
छ्याप्छ्याप्ती छाएको भ्रष्टाचार यहाँ ।
हो, मानिस समाजमा स्थापित हुन र समाज सरह बाँच्नका लागि आफ्नो आर्थिक अवस्था दरिलो र खदिलो बनाउन चाहान्छ । आफ्नो आर्थिक अवस्था बलियो र मजबुत पार्न शारीरिक एवम् मानसिक शक्ति खर्चेर आर्थिक अवस्था दरिलो बनाउनु स्रोह्रै आना ठिकै हो स्वाभाविक हो । यहाँ आफ्नो शारीरिक एवम् मानसिक शक्ति खर्चै नगरेर अरु कुनै व्यक्ति, समाज, संघ, संस्थाबाट फाईदा लिएर आफ्नो आर्थिक अवस्था मजबुत पार्नु दरिलो बनाउनु उचित ठहर्दैन् । ‘फुपुको धन मामाको श्राद्ध’ भने झैँ अर्थात कुनै एक वस्तुसँग साइनो गासेर फाइदा लिदैँ अर्काे वस्तुमा जोडेर उसबाट पनि फाइदा लिनु कस्तो व्यवहार हो ? हाम्रो समाजमा किन यस्तो मनस्थिती रहेको होला मान्छेहरुको ?
यो प्रसङ्ग हो, हामै्र समाजमा रहेका केही शिक्षितहरुको । हाम्रो समाजका केही शिक्षित मान्छेहरु कोही सरकारी कार्यालयमा कोही गैर–सरकारी कार्यालयमा आफ्नो ओहदा वा पद अनुसारको काम गरिरहेका छन् । यी सरकारी वा गैर–सरकारी संघ–संस्थाको नियम कानुन मुताविक काम गरे वापत ति काम गर्ने कामदार वा कर्मचारीहरुको जीवन जीउन पद अनुसार वा तह अनुसार पारिश्रमीक दिने व्यवस्थाको  साथै, उनीहरुलाई काम गर्न हौसला बढाउन थप सेवा सुविधा दिएको छ । अझै पनि पारिश्रमीक एवम् थप सेवा सुविधा पाएका ति संघ–संस्थामा काम गर्ने कामदार वा कर्मचारीहरुले फाइदा लुट्न्  र मोज मस्ति गर्नु ति सरकारी कार्यालय, गैर–सरकारी कार्यालय वा संघ–संस्थामा आफ्नो कामको लागि आउने सेवाग्राहीको छिटो छरितो काम गर्न केही यातायातका साधनहरुको व्यवस्था गरेको हुन्छ । तर, ति साधनहरुको सदुपयोग भन्दा दुरुपयोग बढी हुने गरेको देखिन्छ । सरकारी एवम् गैर–सरकारी संघ–संस्थाको कामकाजको लागि तोकिएको समयमा मात्रै ति यातायातका साधनहरु प्रयोग गर्नुपर्ने हो, तर त्यहाँ काम गर्ने कामदार वा कर्मचारीहरुले आफ्नै मनोमानि ढंगले निजी स्वार्थको लागि ति यातायातका साधनहरुलाई दुरुपयोग गरिरहेका छन् ।
सुर्खेत जिल्लाकै उदारण लिऊँ । यस जिल्लामा रहेका सरकारी वा गैर–सरकारी संघ–संस्थामा यातायातका साधन छन् । जस्तै, कार, जीप र मोटरसाईकलहरु यिनी साधनहरुलाई त शनिवार वा अन्य विदाको दिनमा कार्यालयमा नै राख्नुपर्ने हो नी ? वा हाकिम कै क्वाटरमा राख्नुपर्ने हो नी ? त्यसो नभई शनिवार वा अन्य विदाको दिन पनि प्रयोग गरिरहेका देखिन्छन् । ति सरकारी वा गैर–सरकारी संघ–संस्थामा काम गर्ने कर्मचारीहरुले देउती बज्यैँ दर्शन गर्न, उत्तरगंगामा रहेको जलेश्वर महादेवको दर्शन गर्न, लाटिकोइमा अवस्थित शिव मन्दिरको दर्शन गर्न र काँक्रेविहारका भग्नावशेष हेर्ने ति सरकारी वा गैर–सरकारी यातायातका साधनहरुलाई आफ्नो निजी साधन झै ठानेर गुडाई रहेका हुन्छन् । यति मात्र कहाँ हो र सरकारी साधन एक मुठि खोले साँग किन्न, एक दाना व्रोइलर कुखुराको अण्डा किन्न वजारका गल्ली गल्लीमा गुडाई रहेका हुन्छन् । के कति साधनहरु संघ–संस्था वा कार्यालयको कामको लागि कम प्रयोग गर्ने र कर्मचारीहरुको मोजमस्तिको लागि बढी प्रयोग गर्नु भन्ने माथिल्लो निकाय वा राज्य सञ्चालनको निर्देशन होला त ? यति यो हो भने भाग्यमानी हुन् ति सरकारी वा गैर–सरकारी संघ–संस्थामा काम गर्ने कामदार वा कर्मचारीहरु यति होइन् भने किन त ती यातायातका साधनहरुलाई विदाका दिनमा पनि प्रयोग किन गर्छन् । एक मुठि खोले साँग किन्न जाँदा पनि किन सरकारी साधनको प्रयोग हुन्छ ? यसरी ति यातायातका साधनहरुलाई प्रयोग गर्नु यो के भ्रष्टाचार होईन र ? के सगरमाथाको चित्र अंकित नोटका विटा समात्ने भष्ट्रचारीहरुलाई कार्वाही गरे झैँ यी सरकारी वा गैर–सरकारी कार्यालय वा संघ–संस्थामा रहेका यातायातका साधनहरुलाई कार्यालयका काम वाहेक निजी कामको लागि प्रयोग गर्ने कर्मचारीलाई कानुनको दायरमा ल्याए सकिदैन ? आम जनमानसमा यस्तै धारण उब्जेको छ । खोही कहाँ निदाएको छ अनुगमन र नियमन गर्ने निकाय ? 

                                                                                               कर्णबहादुर बोहरा